Co paso do tempo e o esforzo promocional dos laboratorios farmacéuticos os medicamentos pasaron de ser bens esenciais a simples obxectos de consumo. Hoxe as reaccións adversas aos fármacos xa son a cuarta causa de morte en países como Estados Unidos. O libro expón que medicamentos perigosos están ao noso alcance e cales produciron mortes ou graves danos na saúde das persoas nos últimos anos. É un percorrido pola cara B do sistema sanitario.
Durante máis de catro anos o autor investigou as estratexias que utiliza a industria da saúde e da enfermidade para ser o negocio legal máis rendible do planeta. Sinala como se inventan enfermidades para crear novos mercados e converter en pacientes aos cidadáns sans, como se manipulan os ensaios clínicos a favor dos laboratorios, como se vence a vontade de moitos médicos mediante a promoción, como se controla aos traballadores rebeldes e aos medios de comunicación ou como se espía aos cidadáns a través da receita médica ou mediante a implantación da tecnoloxía de radiofrecuencias nos envases.